東方日報：培力藥業集團主席陳宇齡先生獲頒浸大榮譽院士銜

東方日報：培力藥業集團主席陳宇齡先生獲頒浸大榮譽院士銜

東方日報2011年9月7日 第A16頁

http://orientaldaily.on.cc/cnt/news/20110907/00176_089.html

浸會大學尋日頒授榮譽院士畀四位傑出人士。其中一位獲此殊榮嘅，係於教育界中有卓越貢獻嘅范錦平。

高足趙國雄捧場

范先生早年於浸大英文系畢業，旋即投身教育工作幾近三十年，可謂桃李滿門，佢嘅其中一位高足長實執董趙國雄尋日都有嚟撐場。

趙國雄話范先生係佢中學時嘅英文科老師。除咗一般課堂知識，范先生亦傳授咗唔少做人道理，例如「得人恩果千年記」呢句說話，趙國雄就銘記在心，所以恩師獲頒榮譽院士，幾唔得閒都要嚟撐場。

范錦平就話自己初執教鞭就遇上趙國雄，兩人嘅年齡差距好小，日後咁啱大家都係浸大校友，而趙國雄嘅岳父又係佢嘅粵曲導師，所以兩人相當有緣。

大輝感激「開荒牛」

明白得人恩果千年記呢個道理嘅，仲有立法會議員林大輝，大輝話林大輝中學依家薄有名氣，全靠范先生當年出掌首位校長之職，做完開荒牛之後即宣布退休，對佢嘅付出真係非常感激。

獲頒榮譽院士嘅仲有率先將中藥製成即服顆粒嘅培力藥業集團主席陳宇齡。佢嘅表哥彭浩明就同太太彭徐美雲現身支持。

陳宇齡話，目前仲有唔少中醫，認為中藥製成即服顆粒後，藥效會大打折扣，其實只要有效控制生產過程，藥效無大差異，故此佢雖得此殊榮，仍聲言要為中醫藥嘅現代化努力。